《中環雲咸街》
上屆港姐亞軍朱希敏同07年落選港男李善恒今年初撻着，佢兩個一拍拖就愛得火辣辣，雖然朱希敏近排要拍無綫新劇《衝上雲霄II》，但佢一有時間就會同男友拍拖。
朱希敏同李善恒前晚先喺中環雲咸街一間pizza店開餐，擦到凌晨一點半就手拖手離開，同行仲有幾位朋友。束起頭髮嘅朱希敏一路行一路笑晒口同男友傾偈，睇嚟相當開心。佢哋之後行咗去夜店Fly，入門口嗰陣，朱希敏仲搭住個男性朋友膊頭跳吓跳吓，而李善恒就從後攬住朱希敏條腰，前後有壯男護身唔怕俾人抽水。佢哋喺夜店逗留咗半粒鐘就走人，之後李善恒就拖住朱希敏行去搭的士。的士駛到太古城之後，李善恒發現有記者尾隨，於是好避忌咁即刻叫司機開車走人，而朱希敏就跳吓跳吓咁行入大廈，心情靚到爆。
採訪、攝影：李志明、彭琮然、梁繼光