黎耀祥連奪兩屆視帝獎後身家膨脹，但坦言家中開支並冇因此而大肆增加，即使為宣傳置裝，亦只選擇減價貨。
「唔似黃宗澤 每個月買衫」
太太梁耀蓮（Julia）多年來一直兼任丈夫的經理人，對外負責接洽工作，議價收錢，對內掌管家中財政開支。她指出，丈夫就算為宣傳活動買衫，都要趁減價有折扣才入貨，「一般買幾百至幾千蚊嘅中高檔品牌，最貴嗰套就係前年着住第二次攞視帝獎，成套萬幾蚊」。祥仔笑說自己不愛潮流，「唔係黃宗澤嗰啲，每個月都梗要去買。」
唔會留錢畀兒子
祥仔自言工作以外只是悶蛋，平日愛留在家中，沒有外出消消遣、收藏玩意等興趣。他說，忙起來每月只花費幾千元，「錢多咗就請多咗人食飯囉，開工萬歲請飲嘢，但萬歲都只係幾百蚊。得閑就請家人食飯，我環境好啲，無理由夾啦。」但他坦言，爆紅後很少再乘搭港鐵等公共交通工具，「開始有啲唔係好方便，（被邀）棟喺條街影相好尷尬。」他亦如此教育兒子慳檢的消費原則，最貴買過給囝囝的禮物是iPad。他說，未來不會安排他前往外國讀名校，亦不會特意為他將來預留一筆資金，「佢自己嘅將來自己做決定，我老豆都冇嘢留畀我，唔希望因為我會留筆錢畀個仔，佢就唔使做。」曾有報道指祥仔98年有意拍低成本電影，但他予以否認，「一向冇計劃做生意，行內人做唔到發行，唔係有嚿錢，揼落去拍片就發行。」