黎耀祥在置業投資上同樣缺少一份運氣，即使現在掘到大嚿金，他仍一再概嘆買樓難。為換大屋的目標，他抽身股海，儲定彈藥，近期正四處密密睇樓，為入市作準備。
嘆樓貴難負擔
至今買賣過三層物業的黎耀祥，亦未有掙脫股票輸多贏少的宿命，並概嘆「賤物鬥人窮」的當年經歷，兩次換樓都捉不住樓市的升浪。一家三口現居千二呎的深井碧堤半島海景靚屋，祥仔有意再換大屋，「我越來越多衫，想住大啲，畀屋企人舒適啲……周圍睇啲村屋、公寓，元朗、大埔、西貢等新界地區都有睇……但上到去2000呎，貴到真係好難負擔。」樓市重覆當年的高低起伏，祥仔自問未能拿捏到價位，「家啲樓貴到離晒譜，下下都講緊萬幾蚊呎，貴得嚟唔值嘛！」他認為，港人的購買力將難以繼續支撐，樓市一定會跌，因此要保住現金在手，期望等到樓價回落的接合點可出手。祥仔基本每日都有留意經濟走勢，「用手機上網睇兩份報紙，好快咁納晒啲標題，對香港影響大同經濟嘅事件性新聞一定睇，好似滙豐洗黑錢嗰啲……演員係需要知道呢個社會發生緊咩事，對人嘅價值觀有咩影響，演繹角色嗰陣先唔會有所缺失。」