【本報訊】「我係水房嘅！」兩名醉漢昨晨疑發酒癲，在旺角一間點心茶餐廳因座位問題，撻朵兼發難，雖然店員暗示有「水房」大佬「大豬」照住，惟對方不賣賬，打傷四店員，終由到場警員制服，事後「大豬」到場否認兩漢是同門中人。
四男女被打傷
被捕兩人分別姓盧（35歲）和姓袁（23歲），昨晨6時許，兩人滿身酒氣走進砵蘭街138號一間點心茶餐廳，要求店員在門外開枱招呼，惟遭拒絕後即黑面兇人：「我係水房嘅，水房喺砵蘭街大晒！」女職員即說「呢度係水房『大豬』睇嘅！」，惡漢聞言卻「冇面畀」，大叫「我唔識邊個係『大豬』」，即發難推跌枱凳，起飛腳踢傷女店員，男店東及兩名廚工見狀，上前制止時遭惡漢毆傷。
兩惡漢見警員接報趕至，奪門而逃，跑至30米外的長沙街終被制服按地，以涉自稱三合會成員、襲擊及刑事毀壞三宗罪被捕。疑為水房頭目的「大豬」亦到場，見兩惡漢醉倒攤坐警車上，斬釘截鐵指「我都唔識佢哋」。事件中遇襲男女店員，事後獲送院檢驗。