「黑妹」葉姵延喺倫奧打到入羽毛球女單8強，全港市民都激讚佢嘅表現，呢股拼搏精神繼續燃燒，今次主角就輪到男隊嘅胡贇（圖）。佢噚日喺日本羽毛球超級系列賽男單8強，以24:22同21:15淘汰越南倫奧代表阮天明，殺入今午嘅4強。
31歲嘅胡贇6年前由內地來港，因為未住夠7年，冇得參加倫奧，不過佢最近就大爆發，上星期喺中國公開賽就勇奪亞軍。雖然中國隊因為中日關係緊張而放棄出征東瀛，但胡贇百分百靠自己實力殺入4強，代表作包括第1圈淘汰丹麥2號種籽蓋德；胡贇今日同泰國嘅保辛拿，爭入決賽。女雙孖寶潘樂恩/謝影雪，亦喺8強以2:1反勝日本對手，今日又對另一對東瀛組合，睇吓有冇機會再下一城，殺入決賽。