民主黨立法會選舉慘敗，黨主席何俊仁辭職問責，近日傳出由新丁黃碧雲接任主席嘅消息。碧雲噚日去咗立法會迎新日，被問到呢個傳聞時，佢坦言唔會say no；但係就話家應該係討論民主黨嘅路線問題，而唔係新主席人選問題，佢個人認為民主黨要繼續理性溫和，唔一定要玩激進先有市場。出席同一場合嘅新民主同盟、前民主黨黨員范國威就話，如果係碧雲拍住兩個後生仔做民主黨領導層，顯示民主黨係有承擔同有誠意改革。佢認為，只要民主黨唔再係張文光、楊森、李永達、劉慧卿、何俊仁、單仲偕呢班舊人做領導層，改革方有誠意。