彤叔鄭裕彤入院消息全城關注。除咗鄭家上下之外，相信最為緊張嘅係賭王何鴻燊家族部份成員，特別係江湖傳聞中曾經得到彤叔暗中出手相助、因而成功躋身澳娛（上市公司澳博嘅控股公司）董事局嘅何家四太梁安琪。
話說負責睇數嘅四太喺02年澳娛董事空缺之爭，輸咗畀當時彤叔力撐嘅二房代表何超瓊。但四太不斷力爭，結果2年後成功入局，當時市場就傳四太係因為得到揸住澳娛30%股份嘅彤叔祝福，先至可以入到董事局。
同何家關係唔簡單
關係咁唔簡單，噚日八方當然電聯四太打聽吓彤叔最新情況啦，四太好錯愕咁話：「我都係啱啱喺韓國返嚟，唔清楚呀，我都要問吓人！」八方再問佢彤叔係咪昏迷不醒時，佢就話：「我唔知呀，家無嘢答到你，我一直都係聽緊你嘅片面之詞（彤叔昏迷），我都想同你求證吓！」
後生仔可能唔知彤叔同賭王嘅淵源，彤叔手上嘅澳娛股份，係佢老人家喺1982年，用3億港銀喺同賭王「唔啱key」嘅葉漢手上購入，都算幫賭王除咗粒「眼中釘」，所以兩家人到家嘅關係非常好。好似賭王旗下嘅信德，彤叔家就仲做緊非執董。信德噚晚咁啱又出咗張通告講核數師辭任，但居然張通告尾段仲有彤叔個名！
根據規定，有睇過張通告嘅董事先可以留低個大名，咁係咪想話畀人知彤叔好清醒？定係張通告一早畀咗彤叔過目，所以可以大大隻字印彤叔個名呢？
mailto:[email protected]