曾蔭權心戰室成員陸續「出櫃」，前新聞統籌專員何安達重出江湖，與外號「剃刀馮」、《明報》前執行總編輯馮成章拍檔，去大學、公營機構講危機管理。何安達同馮成章一個係公關老手，一個係資深傳媒人，有姿勢有實際。
公司註冊處資料顯示，何安達（Andy）離開官場後，做咗香港公共傳播學院有限公司嘅唯一董事。Andy同八方講，新公司已接緊job，但仲搵緊辦公室落腳，公司one man band，剃刀馮唔係股東或打工，兩人只係合作形式開班。佢哋啱啱去完科大同管理層講學，以港大8.18事件做案例，教大學高層應付危機，唔知有冇教到入夜後打畀傳媒放風，或將僭建毀屍滅迹呢啲招數呢？