認識唔少想買部二手車嘅朋友，大都只會考慮日本車，往往拒名牌歐洲汽車千里之外。最大原因係認為「歐洲汽車維修一定麻煩，零件售價必然昂貴！」呢個想法好正確，不過，除了全新零件外，只要有門路，亦可搵到合用嘅二手零件，價錢係新件的三分一甚至四分一。 文：梓濬 攝影：譚盈傑
主力平治寶馬
相信大家都知元朗八鄉、錦上路一帶有唔少劏車場，但大家可能唔知嘅係，當中有部份係針對歐洲名廠汽車而經營，就像雷記，主力平治、寶馬，來源方面主要有幾方面，一係因碰撞意外，車主認為維修費相對於車價唔化算，不如送去劏車場；二係車上有主要零件出現問題，例如行車電腦，維修困難，車主認為換車更實際。而「遭遺棄」的平治、寶馬，由於損壞或失靈只佔汽車很少部份，其餘大部份零件仍可正常使用，而同款同型號的平治和寶馬，在香港街道上仍然大行其道。在拆解時，技師會按照有用的零件分門別類，好似車廂嘅冷氣控制Panel、軚盤等，而車身部件則有沙板、泵把，車門、引擎蓋及行李箱蓋等。二手零件嘅價錢，可能係全新件的四分一左右。
唔好以為劏車場就求求其其，當顧客查詢零件時，車場師傅會據你提供車輛的製造年份、出廠日期，甚至零件編號尋找，錯誤的機會率好低。現場所見，除了平治、寶馬，亦有唔少其他待拆的歐洲汽車，好似標致、快意、雷諾，甚至法拉利都有。據場主表示，他們亦會利用龐大零件儲存之便，替一些有價值、遇上輕微意外而毋須要拆解的名貴房車或跑車進行重整維修。
所以，買部車齡就算有十零年的二手名牌汽車，保養維修費分分鐘無想像中咁重皮。
雷記汽車零件
查詢：2488 0905