美國成日話失業率高企，兩大總統候選人奧巴馬同羅姆尼都講要創造就業，NBA就真係幾聽話嘞，連表現平庸到極嘅球員，都仲有班落；之前失敗射手摩里遜加盟拓荒者，周四就連軟腳蟹中鋒米歷錫，都正式以自由身加盟塞爾特人。
米歷錫淪為人球
27歲嘅「榜眼」米歷錫，既係選秀會嘅傳奇，又係選秀會嘅笑話；03年手執2號籌嘅活塞，就揀咗呢位塞爾維亞中鋒，而放棄喺佢之後被選中嘅明星級球員，好似安東尼、保殊、獲迪等。米歷錫都叫做好腳頭，04年冇咩上陣機會，假假地都成為活塞嘅總冠軍功臣，但因為教練布朗唔鍾意新秀；而米歷錫懶散同不積極態度，同當時活塞嘅作風又唔夾，平平凡凡過咗3年後，輾轉到魔術、灰熊、紐約人同木狼，都無甚佳作，職業生涯平均數據，都只係6分同4.2個籃板球。
活塞當年嘅總經理杜馬士，唔係咁冇眼光選擇米歷錫，反而挑選保殊、獲迪等球員，起碼到家仲有星級球員在陣，唔使變成東岸魚腩部隊。
拒絕皇馬千萬合約
今次收留米歷錫嘅係塞爾特人，球隊簽佢係因為內線真係唔夠人；以綠軍想保持季後賽嘅戰力，又有加尼特呢位老將拍檔，希望米歷錫真係改過，誠心打番起。話晒米歷錫自爆，放棄咗西班牙皇家馬德里開出3年600萬美元（約4,700萬港元）嘅合約，反面留喺波士頓，只領取約120萬美金一年嘅老將最底薪。
講開塞爾特人，老牌後衞杜寧畀綠軍裁走後，就決定退休；打咗12年NBA嘅杜寧，希望留番多啲時間，陪伴屋企人，32歲唔算太老，決定退出球壇有啲可惜囉。
03年選秀人才濟濟
03年NBA選秀大會，被譽為繼96年後，另一屆天才橫溢嘅選秀；該年狀元勒邦占士（右一）已成為常規賽及總決賽MVP，並與第4選的保殊、第5選的獲迪，上季攜手奪取總冠軍。另外，第3選的安東尼、第6選的卡文、第18選的大衛韋斯等，也入選了明星賽，成就遠勝該屆「榜眼」米歷錫（後中）。
當然，樹大有枯枝，03年一代也不可能全部都成功；除了以榜眼身份加盟活塞的米歷錫外，以第7選加盟公牛的軒歷治，也屬名大於實；這位6呎4吋後衞，介乎於控球後衞與得分後衞之間，3分球水準也飄忽，加上傷患困擾，上季從鷹隊回流公牛，也無甚建樹。TJ福特、J希耶斯等前列選秀，也只屬浮浮沉沉。
