英倫列強喺歐聯首輪賽事慢條斯理，你急佢唔急，相信主理人已將矛頭指向今周聯賽嘅大戰，逢假日得閒睇波嘅英超迷有福了；強隊有本事玩輪換分兩個陣，做弱隊焗住每場硬砌，毋用猜度鬥志。今周走偏鋒，看上兩支英超開季令人「最失望」嘅球隊，包尾0分嘅修咸頓氣走維拉，跨日射利物浦滅紅魔。
今屆貼英超重點未贏過，但貼英冠則未輸過，攤路奇怪；今天重點貼士，會嘗試加入非英超元素，望提升命中率。英超今周重頭戲碼在明天，強撼強，往往開出令人意外嘅賽果，原因均勢也。先推介利物浦平手盤，上次賽後筆記講過，利物浦從來都係遇強越強嘅表表者，遇紅魔更係領隊粉飾櫥窗、冧老細嘅每季key matches 之一；適逢會紀念希斯布祿球場慘劇96位亡靈，紅軍對強隊打出嘅戰意同不惜氣力嘅踢法，有時好值得尊重，尤其喺咁值得紀念嘅一天。對手紅魔鬼，一如以往季初上力一般，冇朗尼進攻靠晒尹佩斯發辦，唔易喺晏菲路全身而退，今場作客仲有球證賜12碼？莊家更詭異係開紅魔[+1]，必有唔少球迷以為好筍，呢個反而係最危機。我自己必撥部份注碼買主W。
今天重心也來個反高潮，推介另一季初失望之師修咸頓；上季升班馬3支皆能全身而退，保住英超席位，其實統計20年歷史以來只試過兩次。今季3支升班馬計實力，勢難一起逃難，初步睇雷丁太令小弟失望，短期避開佢；反而修咸頓有板有眼，加上有兩位明日之星嘅中場，隊長拉爾拉拿同重金從博洛尼亞加盟嘅烏拉圭小將加斯頓拉美利斯壓陣，會越踢越好。上次大敗予阿仙奴有疑點，今次對手係小弟唔信好叻嘅維拉，射手列基林拔可以講惡，莊家開出包尾隊讓平／半，反添小弟賽前信心。
變招求贏，貼士加入英冠一場「大」戰，名牌狼隊遠征彼德堡。後者6戰全敗，向來審慎開讓球盤嘅莊家竟然出手，大量注碼必傾向連續兩場作客嘅狼隊。逆思考喺密密打嘅英冠，更派用場；彼德堡只受讓平／半咁蝕底？其實狼落英冠地獄，難言場場惡。
文：蘋果波神
今周精選
正：修咸頓（上）
副：彼德堡（下）
冷：利物浦勝