《北京直擊 娛樂名人圈首對同志結婚》
今年名人明星紛紛公開非一般的戀情，黃耀明、慢必等相繼出櫃，卓能主席趙世曾和姚煒的33歲女兒趙式芝，和波爾錶太子女、同性密友楊如芯（Sean），前晚宣佈今年4月已在法國小鎮教堂結婚，成為香港名人明星圈，第一對公開承認結婚的同性伴侶。Sean剖白與趙式芝拍拖七年真心相愛，趙式芝希望時間可讓父母接受，母親姚煒也送上祝福。
明星名人圈中同性戀人不少，但一般比較低調，繼今年黃耀明公開承認同性戀，剛當選立法會直選議員的陳志全（慢必）亦承認是同性戀，而趙世曾和姚煒的女兒趙式芝，前晚公開承認和拍拖七年的同性密友、波爾錶太子女楊如芯已在法國舉行婚禮，成為首對公開承認同性婚姻的香港名人。
雙方父母沒有觀禮
前晚波爾錶在北京舉行和BMW合作的晚宴，趙式芝如女主人般在場招呼嘉賓胡軍、鞏新亮和黃岳泰等，趙式芝和Sean之後一齊騷錶影合照，Sean先拖住趙式芝，之後手搭手合照，少有地公開親熱，Sean大方說：「不嬲冇隱瞞，我哋光明正大。」隨即表示兩人已經結婚，Sean說：「結咗喇！今年4月喺法國一個小鎮。」現場來賓紛紛舉杯祝福，活動如同兩人的新婚派對一樣。
據知Sean早在多月前策劃求婚及行禮，事前聯繫了法國小鎮一教堂，及秘密安排了自己的家人及幾個好友到場觀禮，事前只通知女友趙式芝準備禮服，Sean說：「係有plan，想畀surprise佢，但佢到時say no點算？所以都同佢講咗先。」雙方父母都沒有觀禮，但趙式芝當時穿上雪紡晚裝和Sean行禮，場面浪漫溫馨，兩人更影結婚相留念。同性戀在外國是平常事，但在香港依然是禁忌，兩人同性結婚又公開，Sean說：「我唔介意人點講，呢個社會好open，家乜嘢年代！就算gay又好，lesbian又好，都係兩廂情願，真心相愛。」她表示自己日日講愛的宣言：「我哋一齊七年，想做番少少嘢，係一個肯定，我哋係long term，係真心嘅。」
「我真係好開心」
其實趙式芝結婚，朋友間已經知道，只是趙式芝父母畢竟是上流名人，姚煒雖說近年信教後接受了女兒同志取向的事實，但依然希望女兒低調行事，為顧及父母感受，兩人一直不願公開，前晚一班好友支持及氣氛感染下，兩人才公開承認婚事。
趙式芝接受訪問時，全程都有點尷尬扭擰，不時閃來閃去，問她為何肯嫁？她儍笑說：「佢冇畀我揀喎，上咗賊船呀，俾佢擄咗上飛機。」公開婚事，是否一身鬆晒？趙式芝說：「對我嚟講就係，不過爹哋媽咪唔鍾意我特別講出嚟。不過我真係好開心，畀啲時間其他人（指父母及親朋），香港係保守啲，可能世世代代係咁。」趙式芝好開心成為Sean家的一分子，她說：「Sean父母好錫佢，見到佢哋係一個好堅強、好團結嘅家庭，好榮幸成為一分子，感受到佢哋對仔女嘅愛，好偉大。」
父親趙世曾：黐線
趙式芝表示父母不大接受，姚煒最初非常抗拒女兒戀情，母女關係更一度緊張，當趙式芝前晚公開了婚姻狀況，姚媁昨日則顯出對女兒愛的包容，她說：「我最初好唔贊成，但後來我信咗主，學識咗包容，加上女兒長大唔可以掌控佢，我交畀神為佢祈禱。」現在米已成炊，母女關係怎樣？姚煒說：「我一樣會好似以前一樣咁錫個女，仲會錫埋佢身邊嘅人，但唔代表我贊成。」父親趙世曾則似乎仍未接受，多年前曾表示要貼樓嫁女，他昨日一聽電話就發說：「黐線，冇咁嘅事！」
33歲的趙式芝是已故船王趙從衍孫女、地產商卓能主席趙世曾大女，媽媽則是女星姚煒，外國長大的趙式芝一向性格豪爽，一時打扮女性化，一時男仔頭，06年被本報記者拍到與Sean拖手飲酒，戀情曝光，二人更一同搞手袋生意。
採訪、攝影：葉雪（北京）、林妙萍（香港）
楊如芯（逾40歲）
職位：波爾錶市場經理
背景：波爾錶亞洲區代理商太子女
趙式芝（33歲）
職位：卓能集團執行董事
背景：地產商趙世曾女兒、趙從衍孫女
話你知：多國承認同性婚姻
趙式芝選擇在法國舉行婚禮，雖然當地崇尚浪漫自由，但法國官方對同性婚姻的態度一直在爭論。去年法國憲法委員會作出裁決，稱該國民法中禁止同性結婚的條款合乎憲法原則，意味着同性婚姻仍未合法。今年6月，巴黎舉行同性戀大遊行，令這議題再受關注。至近日，法國左翼政府計劃推動立法，承認同性戀者享有建立婚姻關係和領養兒童的權利。現在不少歐洲國家已批准同性婚姻，比利時、西班牙、英國、德國等都允許同性戀配偶收養孩子。在美劇《色慾都市》（Sex and the City）飾Miranda的仙菲亞妮遜（Cynthia Nixon），今年5月與女友Christine Marinoni在紐約拉埋天窗。
