啲人成日話立法會議員有票無權，原來都唔夠準確，應該話佢哋係有票，不過無財無勢至真。噚日立法會登廣告請總保安主任，起薪月薪逾8.4萬元，做夠4年之後仲加到9.3萬元，新一屆立法會議員就算加咗人工，做足四年，每個月都係得8萬蚊多啲。
做議員冇乜要求，禮義廉做得，唔識英文都得，但係做總保安主任就要有真才實料，入職要求包括要有學位、15年紀律部隊經驗兼最好做過警察、中英文好。
前年立法會已經請咗人，不過做咗冇耐就起身，新一屆立法會議員越來越激，加上狼英當道，隨時天下大亂。難怪新總保安主任返工後，要檢討立法會保安弱點，制訂保安計劃喇。
呢份工，唔知劉江華、李永達同黃成智有冇興趣做？扮過實Q嘅公民黨梁家傑，又有冇興趣？