蘋果迷引頸以待的iPhone5昨日推出，全港潮人掀起一股撲機熱，張智霖自誇成為首位香港藝人擁有iPhone5，更帶挈老婆袁詠儀用情侶電話；連57歲的大美人林青霞也火速搶到，更大晒閃爆火鑽。混血名模Jessica C.晒住警鐘胸晒新機。
蘋果信徒的大日子終來臨，萬眾期待的iPhone5昨日推出，各大明星搶購手機後急不及待放上網晒命，張智霖（Chilam）和老婆靚靚網上晒情侶手機，卓韻芝和模謝芷蕙（Cammi）都成功購入iPhone5，林青霞也湊熱鬧晒新手機，同時更晒閃爆火鑽，羨煞旁人。
超盈擇偶睇家宅
兩大電訊供應商昨日各自舉行記者會，Chilam、苗僑偉、戚美珍和Amanda S.等昨到中環出席電訊商活動。Chilam自誇成為首位香港藝人擁有iPhone5：「我由開始用電話網絡都未轉過第二間，梗係有預畀靚靚，唔係我會死㗎。」他又透露明年買馬，雖然買一隻要過百萬，每年養馬要幾十萬，不過他當做善事。
對於楊怡和羅仲謙的新聞，Chilam說：「我睇到冇愕然，但唔會從一張相斷章取義，下禮拜又有另一則新聞啦，唔需要唔開心。娛圈交往受到拘束，但自己好難隱瞞，所以一開始坦蕩蕩，咁就過得開心快活。」
晒警鐘胸的Jessica C.、何超盈和伍詠薇等昨日到中環出席另一電訊商的記者會，超盈早前被本報拍得與翻版恭碩良約會，她指該男士只是其髮型師：「唔好誤會，佢有女友，影響到佢，好對唔住。」她強調感情未有着落，但有追求者：「大家家庭要夾，普通人家接受唔到咁高調，我都好大壓力，唔鍾意俾人跟，但同我哋拍拖就預咗，我拍拖會公開。」將22歲生日的她自爆已暗示父親送汽車做禮物。
卓韻芝愛不釋手
琦琦昨日取了iPhone5即急不及待試用，她在電話中說：「個電話薄咗輕咗，手感好好，我試過影相，畫面好靚，正好帶去玩同老公同囡囡影多啲全家福。我最鍾意長螢幕，睇嘢清楚好多。」
才女卓韻芝對新機愛不釋手：「我拎住又薄又輕嘅新機，感覺似男友整咗容，香港地圖功能有3D效果，因為畫面長咗，所以自拍出嚟嘅相好瘦。」iPhone擁躉莊思敏則說：「機身外形修長好靚，好襯我。」
採訪：卓寶花、林嘉慈
攝影：陳俊強