朱慧敏拍無綫處境劇《愛．回家》被指扮大牌兼教人做戲，不過前晚7點幾，就見到佢與同劇嘅徐榮、保安局前局長李少光嘅仔李霖恩等一行七人，去咗北角街市樓上好出名嘅東寶小館食晚飯，嗰度除咗餸菜出色，最有特色係用碗裝啤酒，好多藝人幫襯。
徐榮李霖恩受歡迎
朱慧敏等人食咗一個鐘左右埋單走人，之後佢哋一邊行一邊講，行咗去附近嘅新光戲院。原來前晚黃百鳴套電影《男人如衣服》喺度搞首映禮，朱慧敏成班人約埋一齊睇戲。去到戲院大堂，佢哋好快就被觀眾認出，好多人仲興奮過睇戲，圍住班藝人合照。當中徐榮同李霖恩最多人搵佢哋影相，搞到佢哋不知幾開心，笑到四萬咁口。
另外，被指喺劇組神憎鬼厭嘅朱慧敏，全程同班同事傾得好投契，睇嚟佢未必好似外傳咁不受歡迎。
採訪、攝影：陳辰、梁繼光