周三上演嘅亞冠盃其中一場8強首回合賽事，伊朗代表沙巴罕主場迎戰沙地阿拉伯嘅吉達艾阿里。比賽期間上演咗一幕驚心動魄嘅爆炸事件，該場執法嘅香港裁判仲差啲遭殃，好彩事件最終都冇造成嚴重傷亡，不過都一額汗。
事緣該場比賽戰至下半場，有球迷不斷向場內擲出雜物，當時沙巴罕球員高拿卡積將部份雜物執起之後，隨手將佢哋拋出場邊；之後，幾名沙巴罕隊員，加埋來自香港嘅主球證廖國文同旁證周駿傑，走到場邊了解事件之際，高拿卡積拋出嘅雜物突然發生爆炸！隨即嚇到廖國文同周駿傑拔足而逃，反而幾名沙巴罕球員就施施然咁行離事發現場，睇嚟佢哋對球迷呢啲暴力行為都見慣見熟。
執法亞冠盃嚇餐死
話就話見慣呢啲場面，但若然高拿卡積遲幾秒先將件爆炸物扔走，呢名沙巴罕中場隨時被炸至遍體鱗傷；甚至連球證都會遭殃。事件一度令球賽中斷接近10分鐘，懷疑被爆炸碎片擦傷嘅旁證周駿傑（小圖），仲要入更衣室換埋件衫。雙方球員嚇一嚇之下，最終呢場亞冠盃互無紀錄，悶和收場。
事發後，4名執法嘅香港裁判經已返港，擔任旁證嘅周駿傑好彩只係俾爆炸物彈出嘅碎片輕微擦損右大腿，並無大礙；至於主球證廖國文就冇受傷（見另文）。不過，我求大俠就覺得經過今次嚇餐飽之後，若果下次亞冠盃賽事再搵香港嘅球證，走去好似伊朗呢啲西亞國家執法嗰陣，真係要認真諗過先。
陳譚新：球證勇敢
對於今次爆炸事件，前國際足協球證導師陳譚新已致電問候過幾位執法球證，佢透露，除咗旁證周駿傑右大腿有擦損外，其餘3人都冇事。陳sir又大讚主球證廖國文勇敢，佢話換轉係佢執法嘅話，可能已經腰斬咗場賽事︰「通常發生事故後，場監、球證同埋當地保安，會開幾分鐘會議，商討吓場波係咪繼續進行，而今次可以照踢完場波，即係話場監以百分之百保證安全。事實上，若然場波要腰斬，擇日重賽等行政安排會更加複雜。之但係畀着我做球證，如果認為當地唔安全嘅話，絕對有權提出腰斬。無論如何，相信今次事件後，國際足協或亞足聯都會追究，可能判罰伊朗唔可以再喺主場作賽。」