娛圈質素每況愈下，廣告人Grace呻搵代言難，請奀星怕無Noise，花六七位數字請姐仔，驚有負面新聞喊都無謂，唔怪之得幫超市日日賺的黎耀祥，哈囉喂長老的羅蘭，和入咗你屋的陳豪可以長做長有；PCCW Mobile近排就請來「誰輕輕叫喚我」的城城賣廣告。黎明阿may的年代，手機尚未普及，靠大堆頭大製作吸客合情合理。但現時每人一機，又再沒有特約銷售商呢支歌仔唱，大家各出奇謀撬走對家的客。今次請來玩賽車又是馬主的城城Glamorous式登場，廣告費固然不菲，Samantha相信算到盡的小小超絕不會白花，上星期佢哋就推出「無限本地通話」搶客。當流動通訊商已經打到拳拳到肉，香港電訊（6823）走雙線發展，搞埋Smart Living，首先城城搵客仔，再由陳豪設計及安裝光纖網絡，用WiFi接通智能電器如冷氣、電視及燈光等，食晒兩邊茶禮。港股繼續chok，以高息見稱的香港電訊有望創上市新高，可趁回吐低撈。Samantha本欄逢周一、三、五刊出