中秋將至，本月底一連三日，是大坑舞火龍的大日子，也是活動總指揮陳德輝，最忙碌的日子。身為大坑仔，輝哥一家五代舞火龍，他做過華籍英兵，也見證過半世紀前仍未填平的大水坑，如何一夜間淹沒農田。14年前，他為了參與「起龍參神」儀式，勤練客家話，又教幾代新舊村民紮龍秘技，為的，是將這項逾百年傳統，一代傳一代，延續下去。記者：呂麗嬋
「我11、12歲就開始舞龍，由少年舞到老年，今年我66歲，舞咗足足半個世紀，舞到列入埋國家級非物質文化遺產，身為大坑仔，你話幾自豪？每逢9月，學生哥忙住開學，我就忙住訂草訂竹紮龍。火龍由珍珠草紮成，貪佢夠堅韌，呢啲草，以前香港通街都係，家返大陸搵，都搵唔到咁多，東莞起晒工廠，草地變石屎地，見條草都難。
對水坑又愛又恨
要紮好一條67米咁長嘅火龍，閒閒哋要百幾擔草，要喺廣東省到處搵。但好神奇，福利會門口竟然生咗幾棵，可能係大貨車運嚟時，啲種子飄落啲泥度。人生，就係咁奇妙。我哋五代人喺大坑住，後生做華籍英兵，成日唔喺屋企，年紀大，諗番呢條家陣已經填乾晒嘅大水坑，又好懷念。
呢條大水坑，從畢拉山流往維港，兩岸住咗上千客家人。我哋對條水坑又愛又恨，愛佢川流不息，又恨佢成日氾濫成災。平房變商廈、海港變維園，大坑村嗰條大水坑，都已經消失無蹤。乜都唔見晒，但好在，舞火龍嘅傳統，就代代相傳，係我哋大坑人嘅情意結，抵得起煙熏火灼、擔得起條重的火龍，先係男子漢。
每次動員400人
舞火龍係每年中秋前後搞，火龍用珍珠草紮成，全長67米，由32枝竹杆串連成條龍，淨係龍頭、龍尾，就各要30幾人，仲未計龍珠、龍身、蓮燈、紗燈、音樂、紮龍，閒閒哋，每次動員300、400人。我6歲就參加，但當時年紀細，只可以舞花燈，到11、12歲就舞龍。舞龍身係入門，舞龍頭就要好大力，舞足一個晚上，輪住替換，舞完，成身都散晒。
60年代，社會好窮，為咗慳兩塊布，舞火龍嘅T shirt無袖，一邊燒炮仗、一邊舞龍，啲爆竹隨腋下跌入衣服，辣到呱呱叫。家冇得燒炮仗，件T shirt都真係T shirt。家乜都系統化，7月派單張，招攬壯丁；8月舉行工作坊，教舞龍和紮龍；9月真正『埋牙』。時代唔同，梗係進步。但點都好，呢項大坑傳統，一定會延續下去，係你同我嘅集體回憶，你話係咪？」
爽知識：舞火龍化災劫
大坑舞火龍，有130多年歷史，年前正式列入國家級非物質文化遺產。相傳1880年嘅中秋前夕，大坑村村民打死了一條大蟒蛇，之後爆發瘟疫，村中父老得到菩薩報夢，話條蟒蛇係龍王之子，要化解災劫，就要以火制水，自此，村民每年中秋便夜舞火龍，燃放炮仗，硫磺煙熏，祈求平安大吉。
