噚日一班魚翅業界人士去國泰航空金鐘辦事處示威，抗議國泰停運大部份魚翅及鯊魚製品，有警員到場維持秩序。八方發現其中一位警花好面善，原來係無綫前新聞小花周詩泓，佢5月學堂畢業，喺中區做小隊指揮官。雖然Madam周剪咗一頭英姿颯颯嘅短髮，又冇乜點化妝，但個樣仍然見得人有餘。唔怪之得佢雖然喺電視台其實唔係做咗好耐，但都有唔少觀眾力撐。近年唔少女記者轉做警察，警方不時俾人批評唔尊重新聞自由，唔知多咗做過記者嘅人加入警隊，對改善警方同傳媒關係有冇幫助？
