政務司司長林鄭月娥升官三個幾月就瘦咗成個圈，修身成績勁過全城纖體瘦身公司，官場中人議論紛紛，擔心好打得嘅林鄭太多火要撲，可能搞壞身子。噚日林鄭出席公開活動，八方見佢精神爽利，應該仍然「好打得」。八方問林鄭係咪真係瘦咗好多磅，佢面露微笑話「係呀，瘦咗好多呀﹗」講嘅時候，林鄭並冇停低腳步，八方再追問佢身體有冇問題，林鄭已經一個箭步走到老遠，行動十分迅速，最放心嘅應該係狼英，事關要林鄭執手尾嘅事肯定陸續有嚟，林鄭大把救火任務。