中環盛事之一「對冲基金博擊之夜」下星期二又嚟喇，今年中環不停話炒人，唔少基金經理又輸到冇影，咁大壓力，正好搵個機會發洩。滙豐爭到出面，一口氣派出8人參加，誓要保住金腰帶！呢場盛事搞到第六年，以籌款為主，今年有破紀錄70位金融界人士參加，其中10位係女士。參加者早於6月一路特訓一路進行淘汰賽，正式比賽當晚只有12人。過去五年，成績最彪炳係滙豐，三戰三勝排榜首，佢哋今年亦志在必得。聽講唔少參加者好認真，碰啱係ibanker（sell-side）同芬佬（buy-side）打，ibanker成日要睇班芬佬面口，仲唔有仇報仇咩！