強國反日，玩殘自己股市，中央換屆又未明朗，救市一拖再拖，滬股2000關勢將失守，基金就算追貨，首選都係本地薑。樓市火熱朝天，土炮地產股成為喪炒對象，一向甚低調的爪哇控股（251）本月以來飛升5成，皆因資產有價，聰明錢正逐步反映其合理價值。麗新系一向以折讓超大見稱，昨日集體炒上，不排除系內又有重組動作。不過，最令魏力感興趣的，反而係06年重組時已剝離麗新系的鱷魚恤（122），因其潛藏折讓及賣盤兩大爆升因素。先講折讓，公司現價0.42元，市值唔夠4億銀，同殼價差唔多，但今年初業績計，物業已值8.3億銀，即每股0.89元，整體每股NAV達1.1元，折讓逾6成。觀塘重建項目如箭在弦，啟德遊輪碼頭興建如火如荼，東九商廈近月又升值兩成以上，集團持有的鱷魚恤中心寫字樓市值料已逾10億銀，可見實際折讓幅度更大。再談賣盤，主席林建名已年屆75歲，雖然主業已由女兒林煒珊打理，但租金不斷上漲，管理層亦表示零售業難撈，中期純利倒退6.5%，毛利率降至64%，正反映盈利不斷受租金蠶食的因素。由此可見，集團趁高位賣盤或賣殼的機會不低，一旦成事，股價升幅難以估計，短炒不妨先睇5毫。魏力 http://www.facebook.com/2012jason