不知是老了容忍力下降，還是世事真的令人髮指，近日總有事情睇唔過眼。睇樓，明明幾年前值200萬的單位，家值400萬，睇唔過眼！睇波，看見熱刺和皇馬的後備陣容，更是睇唔過眼！先講熱刺，今季新帥上任，整體陣容有出有入，惟獨門將一環最令人大惑不解。以高價1,000萬歐元購入的法國國家隊正選門將洛里斯，上周對雷丁竟只列後備。我不是年齡歧視，質疑年屆41的費度的把關能力，但請考慮下洛里斯戴着「星級門將」光環來投的感受，相信他坐在冷板的90分鐘都在嘀咕：「係咪玩我呀？」考慮到熱刺還有古迪仙尼和靴里奴高美斯兩位實力分子，分別只列3、4號門將，令人不禁問句，熱刺要打幾多個龍門？至於出名是「球星墳墓」的皇馬，進攻中場位置早有奧斯爾鐵膽正選，今季更買入莫迪歷，令卡卡淪為第3人選。可惜季初皇馬又因為錢銀傾唔掂，不願將之借往AC米蘭。那邊廂AC中場創造力凋零，在歐聯連小組最弱的安德列治都贏唔到；這邊廂皇馬卻把艾辛推前當進攻中場，都只將卡卡放在後備，令這位巴西國腳開季以來，1分鐘正式比賽都未有。情形就好似一個富翁發達後坐擁多間豪宅，卻死抱着個公屋單位唔放，不願交還政府讓給有需要的人。以「公屋」來比喻卡卡當然不太恰當，但兩個情況確有共通點，就是「資源分配不均」，令人睇唔過眼！方柏翹now足球評述員