CY上場前後，香港人放假多咗個活動，時不時都要上街遊行，渣打同CY無仇無怨，都忍唔住要喺今年11月18日發起大遊行，不過係開心嘅渣打藝趣嘉年華，但巡遊路線竟然同7.1遊行路線一樣，由維園出發，去到駱克道同景隆街交界折返，好搞鬼。渣打除咗有馬拉松，亦贊助藝趣嘉年華12年，仲越搞越大，由最初喺赤柱廣場，後移師維園，今年更加衝出維園殺入銅鑼灣。暫時估唔到參與人數，但按以往紀錄，實同警方公佈數字有出入！渣打香港行政總裁洪丕正噚日現身介紹呢次嘉年華，說也奇怪，大會安排記者會下午1點半開波，一班活潑可愛嘅小朋友又唱又跳，兩點鐘完事，班小朋友一離開，即刻滂沱大雨，咁仲唔係連個天都錫住班小朋友？CY真係唔好搞啲細路呀。