韓國人氣男團BIGBANG成員勝利，日前嚟咗香港，仲俾本報直擊佢喺灣仔夜蒲，攬實房祖名緋聞舊愛、日模久保杏奈，久保仲錫錫勝利。噚晚久保杏奈同Jessica C.、Alice B.等喺又一城行時裝騷，久保一見記者就認衰用英文話：「哎吔！那個是bye bye kiss，我爸爸是西班牙人，說bye bye會攬攬的。」即唔係戀人？久保話：「現在是好朋友，不知道呀，不過他人很好，很可愛。」久保話同勝利半年前喺東京認識，問係咪大家有好感，佢就話：「是的，但我想不是愛。」問佢係咪勝利追佢，或叫佢做女朋友，久保即嚇到連續講咗五聲「No！」不過，久保承認勝利有邀請佢睇年底嘅演唱會，但佢未知去唔去。
激嬲媽媽
久保又被影到喺K房出嚟之後，整衫兼露點，久保話俾喺日本嘅媽咪狂鬧：「我在裏面跳舞，但衫爛了，出來整理，還以為是鏡，我很不開心，媽媽很嬲，說鄉下全村人也知道，我也不敢回去。」Jessica C.就即場大晒新學嘅兩句普通話：「我很開心，我很忙！」和「我愛香港！」