說旅遊拍攝係輕易之事！擔任旅行社攝影顧問嘅Peterpenn談及一次到訪貴州嘅攞你命三千之旅，揹住五鏡兩機喪影三日，他說關鍵要識揀一個適合自己嘅相機背囊。記者：陳國輝攝影：潘志恆、被訪者提供
旅攝人：背囊透氣減磅
Peterpenn縱橫攝影界三十年，雖然主力係商品拍攝，但亦擔任過康泰旅行社攝影顧問。講到旅遊攝影，佢話最難忘肯定係貴州嗰次！「每年農曆10月，當地會舉辦一連幾日嘅苗年節慶祝活動，苗族女仔會戴上精緻銀器，又穿上華麗民族服飾，載歌載舞，非常熱鬧！」但要拍攝呢一刻精采畫面，可以話絕對艱苦！Peterpenn解釋，每天邊走邊攝，消耗十幾粒鐘體力都算，最慘要揹住兩部大機、五支鏡頭、一支腳架、食物、水同風褸，究竟加埋幾多磅？佢都唔敢估。常人揹半日就投降，但Peterpenn認為大家不妨從選擇器材方面出發，減輕痛苦指數！佢話大細攝影器材因人而異，若揀相機袋嘅話，應選擇背囊為佳。「主要係方便做嘢，其次由於長時間揹上身，背部需要一個透氣網，降低溫度；另外還需要具備減磅帶，就算背囊幾重，揹上身感覺都會輕鬆啲。」
放機放鏡放NB
呢款 Pro-Light Revolver-8 除咗具備多層間隔，可以存放相機鏡頭、手提電腦及個人物品之外，最特別係內裏的滾筒式軟墊格層設計，能夠擺放一支長鏡及四支短鏡，想更換鏡頭時，只需要轉動滾筒就可以拎出來，極為方便。
輕裝單邊側揹
國家地理NG推出嘅Earth Explorer系列玩大自然生態概念，如NG2476就採用軍綠色軟身帆布作物料，內膽印有地圖，可放一部DSLR相機和一支鏡頭。
龍女城市潮味
Manfrotto特別為女仔着想，設計咗一款罕有嘅白色相機袋。佢屬於側揹設計，重量僅450g，但勝在內櫳有兩層間格，可存放一部DSLR及一支28-300鏡頭，拎去「打雀」都無問題。查詢：2327 6728
