中日釣魚島爭拗升級，拖累內地A股又破底，港股噚日都要下跌250點。其實，升市點會冇調整，最緊要係持有嘅股份夠實力，增加持倉防守性，至於手持現金嘅話，就應該備忘多隻好股，等到下一浸升市初現，見走勢好即買入持有。踏入9月，其中一個最強嘅股份板塊，應該係電訊設備股，至於會唔會係虛火，就絕對有可能，因為論基本因素，一批質素較次嘅電訊設備股，食粥食飯都要睇內地電訊商未來資本開支幾多，仲要睇吓產品競爭力如何。比較穩陣兼前景明朗嘅電訊設備股，就要數中通信（552），點解咁講？第一，佔佢上半年收入47%嘅業務流程外判服務，雖然利潤率低啲，但係主要同電訊商經營開支相關，即使電訊商資本開支減少，對佢影響冇咁大，事實上，上半年呢Part收入增長23%，亦係三大業務升幅最快，算係相當穩健嘅生意；第二，佢佔三大電訊商中電信（728）、聯通（762）同中移動（941）嘅定單分別達到90%、30%同25%，全國市佔率50%左右，業務門檻亦比較高，外來者難同佢爭生意；第三，由09年至今，中通信每半年收入同盈利都按半年上升，穩步增長程度仲勁過唔少藍籌股。
門檻較高盈利穩增
中通信今年初供股集資36.77億元，集資後6月底淨現金超過80億元人民幣，證明嚟緊大把項目要搞，其中一個就係要爭取非電訊營運商生意，即係上半年收入比重只有9%嘅應用、內容及其他服務之內，呢個應該係長遠增長動力所在，遲啲仲會發掘其他併購機會。另外，上半年海外收入下跌，但目前已知唔少海外收入下半年先嚟料，所以中通信下半年業績應該相當靚仔。雖然股息率有3.41厘，唔少投資者仍覺得佢派得少，不過，佢正係發展業務途中，派息唔多係可以理解，況且有3厘以上，都好過買樓收租。中通信下半年業務形勢比上半年好，假設下半年每股盈利按半年增長5%，現價市盈率大概10倍。睇呢隻股盈利年年穩定增長，10倍市盈率絕對抵玩，4.30元左右已可吸納，睇13倍市盈率，中線可以上望5.80元，回報逾3成，絕對有條件完成。晉佳本欄逢周一、三及五刊出