上海桌球大師賽噚日又爆鋪勁，上星期贏完香港名將盃嘅澳洲型男羅拔臣（圖），竟以0:5輸畀英格蘭嘅佩利，16強出局。擊敗2010年世界冠軍羅拔臣嘅佩利，近年成績好一般，而且從未攞過排名賽冠軍，連佢自己都估唔到一開始就連贏兩局，第3局仲打出一棒75度，領先到3:0。不少觀眾諗住羅拔臣會發力，但偏偏越打越沉，輸多兩局提早畢業。
今屆都幾邪吓，好多有叫座力嘅星級球手，例如世界第一兼衞冕嘅沙比、香港代表傅家俊，仲有丁俊暉等4位中國球手都全部下馬。不過，00、03年世界冠軍威廉斯就順風順水，以5:2力壓禾頓，呢位上屆亞軍今日8強就會對佩利；另一熱門鄧立普以5:2反勝，8強將撼杜特，希望兩位都醒醒定定，繼續有好表現啦！