藝人車震單新聞真係好爆，但大家唔好掛住八，忘記買六合彩，明天六合彩一注獨中有一億彩金，呢鋪仲唔掃到豪宅？買股票可以問冧巴，買六合彩點畀冧巴呢？用排除法，孫柏文同火燎森兩位「明燈」應該幫到手。
睇開《爽報》「300萬爽組合」嘅讀者，應該知道孫柏文同火燎森有幾「燈」，火燎森將個倉九成資金買重比亞迪（1211），7月中輸足四成最先被叮走。
肥孫就多數買乜輸乜，最近輸緊三成，一鋪蝕沽清倉後，前幾日一注買重五礦資源（1208），又要輸4%，至今肥孫個倉輸36.12%，五礦跌多些少，肥孫就要出局。
三位大師 揀剩26個冧巴
兩位明燈咁堅，一定要畀啲冧巴出來，等大家參考呀，唔好買啦。在此多謝二人好幫手，好快手咁走去投注站各買一張廿蚊電腦飛，扣咗重複嘅冧巴，有20個冧巴畀大家考慮唔揀。
講起冧巴，又點少得成日畀冧巴嘅陸叔陳永陸，原來佢冇乜橫財運，同同事夾份買六合彩中得一、兩個字，買馬仔實輸。咁就啱使喇，佢話鍾意6，畀咗五個有「6」嘅冧巴，加埋「1」，大家又可以減多3個冧巴，即係只需揀26個冧巴。
截至噚晚11點，呢期六合彩有超過9000萬投注額。中環士丹利街投注站出產過多名六合彩頭獎得主，北角馬寶道投注站就誕生「幸運阿星」，呢兩個投注站呢兩日應該爆到不得了，祝君好運。
李華華
mailto:[email protected]