華爾街史上任期最長嘅CFO維尼亞（David Viniar），做咗高盛12年，明年1月底退休，由高級交易總裁施瓦茨（Harvey Schwartz）接任。口痕友估計，呢次調動為施瓦茨更上一層樓鋪路，佢隨時頂埋布蘭克費恩（Lloyd Blankfein）CEO個位。呢兩年投資銀行界不停講削減成本同裁員，高盛唔例外，不時裁員，又推一班較後生嘅投資銀行家同交易員上位。施瓦茨今年48歲，97年加入高盛，做過唔同職位。有人好醒咁講，施瓦茨近月多咗出來見分析員同投資者，佢做過咁多位，了解成間公司嘅運作，做CFO難唔到佢。之不過，維尼亞講過，高盛最大危機係資金流動性，施瓦茨一定要執佢手尾咁話！咁啱最近市場經常傳出CEO布蘭克費恩會離職，有人就估計，施瓦茨做得咁上下，可以問鼎CEO呢個位