周星馳呢排頭頭碰着黑！唔只俾前度于文鳳入稟高等法院，追討7千萬佣金同顧問費，甚至連梁思浩都摷番十幾年前嘅陳年舊史嚟講，踢爆當年拍電影《國產凌凌漆》一場喊戲，俾星爺玩謝要佢喊足17次，但只係roll機一次。
不時咬手指
自從呢兩單嘢後，星爺都冇露面，前晚10點幾佢終於蒲頭，去咗至愛嘅中環歌賦街On Lot 10法國餐廳，同兩個西裝友吹水，每人叫咗杯酒飲，見佢唔停嘴咁講嘢，仲不時咬吓手指，個樣好似鬼見愁咁，唔知係咪同朋友呻緊呢？
平日鬼咁精靈嘅佢，連記者喺門口影相都唔察覺，反而坐佢隔籬枱嘅鬼佬，就好醒咁走嚟同記者講：「唔好影我。」呢個時候星爺先知黃咗，佢即刻由餐廳後門速撇，仲玩變身喺cap帽外再着連帽外套，將自己包到成個神秘人咁，一支箭上咗七人車離開。
採訪、攝影：吳耀輝、徐錦池