時間過得快，眨吓眼又一年。去年9月15日本欄記述Pato（披圖）在沙田馬場訂下廂房請客，慶祝生日，當其時有不少披圖之英皇書院校友到場，最著名一位就係梁振英，所有在場校友一致支持梁振英出馬競逐特首寶座，振英哥對沙田馬場不熟，行咗一輪先至搵到第一座看台之七樓廂房。咦，當日未上位喎，為咗拉攏各界，自然不辭勞苦。今年九月十二日晚，披圖又賀生日嘞，今勻適逢快活谷夜馬，佢訂下馬主廂房E414擺三圍請客，呢個廂房就真係方便到極，一出就係，房內玻璃窗可以睇見沙圈與終點，位置一流，唔怪得披圖話：「訂呢個廂房好辛苦㗎，好難訂得到。」自廂房行出去轉右就係一列董事廂房，然後係名譽會長廂房。邊位係馬會名譽會長？以前就係香港總督，家就係香港特別行政區行政長官。呢晚名譽會長廂房內人頭湧湧，十分熱鬧，原來係梁特首請客。三百六十三日之後，梁先生身份完全唔同晒，問披圖：「今晚有冇請梁校友嚟參加生日宴呀？」披圖連忙耍手：「梁特首現在好忙好忙㗎，千祈唔好打搞佢！」冇大人光臨，大家講吓馬仲好，披圖隻馬「仁心仁術」今季轉倉，轉往何良馬房，披圖話：「何良講第一場2號『好笑容』機會甚高，我隻馬係第2場8號，有機會起孖㗎！」係就幾好噃，分頭不俗吖嘛，於是幾位老友買一場2、二場8獨贏位置混合過關，點知在座一位極有獨立思考之人，就係著名演唱會主理人丘亞葵，丘兄大聲講：「以我刨馬所得，披圖隻馬仲未掂，今晚輸咗九成，唔使買！」披圖大笑：「我隻馬爆幾十倍大冷門之時，你都係咁講，結果成間房係你一個冇錢收！」亞葵哥不為所動，堅持己見，客人咁唔畀面主人家壽星公，少見也！左丁山聽見亞葵哥咁有信心，立即縮沙，本想買一百蚊一注，改為三十蚊，好彩，亞葵哥目光如炬，「仁心仁術」大敗，左丁山好彩縮注及時！獨立性思考、批判性思考係好重要嘅，政治學習如是，國民教育如是，跑馬賽馬更加需要，純粹聽人哋貼士落注，好易輸死！