上星期為備戰毅行者進行操練，早晨黃昏都已有秋意，不過其他時間都仲係相當悶熱，我都差啲中招，即係中暑。其中原因都係有隊友當日步履如飛，狀態好弗，幾經辛苦先勉強全程跟上，體力虛耗至今都仲未恢復過來。
我還以為他在操練前休息充足先有如斯表現，恰恰相反，原來嗰晚佢要搞到半夜三更先有得瞓，點解？因為剛好過了午夜12點，物業賣方才願意簽下臨時買賣合約同收票，而隊友亦在今年30歲前完成了人生的其中兩件大事，包括結婚和置業。
各位如有印象，我早前提及一個調查，比起成家，港人更視置業為首要人生目標。想他大喜當日，我身在海外，未能親臨道賀，不過家陣都總算分享咗佢晉身有樓階層的興奮同埋……步速。
大型屋苑 竟得一個放盤
成50幾公里嘅操練當中，大家嘅話題自不然就落喺呢個置業的故事上面。我問佢層樓睇咗幾耐先決定買下，而答案就係嗰日係第一次睇，亦係唯一一個睇過嘅單位，即晚就簽。
嘩！唔知仲以為係買菜，再者以我認識，隊友雖說年少，但絕非「無知」，亦唔係「氣盛」衝動嗰種人，所以箇中必有苦衷。原來佢心儀嘅地方，係一個港鐵沿線嘅大型屋苑，而佢父母亦係該屋苑居民，通常買樓都會摻雜感情因素，而呢啲唔單止係個人，其實仲有老婆、老竇、老母、老婆嘅老竇老母，如是者一大堆他人嘅「感情」考慮喺裏面。總之近親近鄰就已攞咗印象分。
不過都未至於要即刻扑槌噃？況且，咁大個屋苑都應該有其他嘅選擇。而答案就仲得人驚， 係「冇」！全屋苑有3000幾個單位，但係上個周末前，幾乎所有放售嘅業主都已全部封盤，隊友兩小口子行勻嗰度咁多間地產代理，但冇一間仲有盤可以畀人睇。
唔知啱啱公佈一系列「未雨綢繆」的措施，以壓抑「事先張揚」的炒風嘅嗰位金管局總裁該作何想？上星期話就話失驚無神，但其實係早有預期嘅QE3一出，市場梗係有所反應，但亦估唔到金管局同樣咁快出手，好似慌死啲人唔知個市又會被炒起。總之就係成功「預警」，因游資帶動的投資需求仍只聞其聲；供應已急不及待喊停，伺「價」再動，而樓市必然會經歷另一輪的乾升。
講番個隊友點解最後都上到車，因為佢根本就唔信新任政府嘅房屋政策，所以先堅持唔靠政府，仲要對着幹，當然佢亦係一個有心同有力（佢嘅彈藥並非特別充足，而係之前為咗儲錢買樓同往後供樓，佢認真做咗好多準備）嘅準買家。而剛好有個要樓換樓嘅業主喺地產代理苦苦相求之下，願意畀隊友睇樓，往後發展就如立法會拉布，雙方一直喺個單位裏面糾纏，直到業主態度有所軟化。
然後業主藉口話都要食飯喇，代理與隊友心知不容有失，豈能放虎歸山，因此一齊晉餐兼繼續落藥，卒之取得最終「拉布」勝利，再上番去就「簽」！
盧先亞