新世界發展（017）創辦人鄭裕彤今年87歲，年初正式退休交棒畀阿仔鄭家純，唔知大家係咪好掛住佢，定係睇得多國家副主席習近平稱病失蹤單新聞，從而產生聯想，噚日傍晚市場傳出彤叔入醫院嘅消息。八十幾歲老人家入院可大可小，雖然話佢已經宣佈退休，但如果大吉利是真係有乜事，短期唔多唔少會影響到上市公司，繼而又有分家產、爭家產嘅隱憂，投資者同傳媒都會好頭痕。
消息人士答得玄
華華於是即刻打電話問彤叔身邊人，麻煩佢幫手搵吓彤叔，問候聲佢老人家，點知呢位仁兄答得好玄，指彤叔已經退下火線，唔會理公司嘢，唔知佢去咗邊度，仲話如果彤叔見到佢個電話來電顯示，會以為同公司有關，唔接佢電話㗎！（真係想知佢平時點搵彤叔㗎呢？）搵咗一晚，截稿前都證實唔到彤叔身在何方，入院傳聞依然係傳聞，惟有今日一早去中環新世界大廈等純官返工問清楚啦。