堪稱「國泰李察基爾」嘅國泰航空（293）前行政總裁湯彥麟（Tony Tyler），離開咗國泰同香港一年有多，去咗瑞士做IATA（國際航空運輸協會）理事長兼行政總裁逍遙快活，感情生活亦相當充實，上月初再婚，新娘後生佢大約廿年，下星期佢就會帶埋新婚太太返香港走一轉，同舊朋友見面。
歐洲公幹邂逅
變身IATA李察基爾嘅Tony雖然今年已經57歲，但依然靚佬，冇乜老態，聽講佢離咗婚一段時間，同前妻所生嘅三個仔女，已經仔大女大。佢近年不停有蜜運，曾經同一位喺銀行做嘢嘅香港女仔拍拖，分手後，喺歐洲公幹開會時遇上家呢位太太，雖然兩人年齡相距差唔多20年，女方只得三十幾歲，但無礙發展。新任太太叫Charlotte，丹麥人，據講份人好識做，事關佢認識Tony嘅時候，係喺一間航空公司工作，Tony當時仲係國泰話事人，拍拖冇幾耐，Charlotte就冇做航空公司，家係一間英資大企業嘅法律顧問。Tony舊年5月亦離開國泰，去IATA返工。兩人今年8月初喺歐洲結婚，唔知係咪好多香港朋友未能抽空參加婚禮，Tony喺香港幾十年又識落好多朋友，咁啱下個星期Tony要為IATA來港開會，佢已經約好一大班香港朋友下周五喺一個會所聚會，介紹靚女老婆畀大家識，華華認真要講句：恭喜恭喜！李華華mailto:[email protected]