今季加盟火箭嘅控衞林書豪（J.Lin），周二出席球隊第一課操練，引嚟一大班傳媒嚟追訪；林瘋仲講新居啲傢俬已經入晒伙，話一定要瞓好啲，又讚當地市民友善，睇嚟佢喺侯斯頓嘅新生活都開始得唔錯喎。
大批傳媒採訪人氣勁
話明第一課操練，傳媒又點可以放過呢個追訪林瘋嘅機會？J.Lin傷咗咁耐，好多人都以為Linsanity熱潮會完結，但係周二咁多記者去，就證明咗狂熱依然未降溫。不過，呢位之前喺香港過24歲生日嘅控衞，就繼續保持一貫謙虛作風；佢話：「我唔覺得我已經係球隊嘅標誌人物，火箭係一隊好年輕嘅球隊，而且好團結。呢隊波唔會係一個人單天保至尊，我哋會一齊合作完成任務。家講目標仲言之尚早，我要熟識其他隊友先。」J.Lin仲話自己減咗10磅，狀態十足迎訓練營。
林瘋仲同記者講，傢俬已經入晒伙，所以唔使再喺柏臣斯屋企過夜。J.Lin話：「我一定裝好張床，等我今晚瞓好啲。」喺紐約住W酒店一類酒店式公寓，但係去到侯斯頓咩都要自己嚟，尤其係簽咗3年2,500萬美元（約1.94億港元）合約，當然要有自己嘅傢俬，住得舒服啲啦；不過由身無分文到家可以擁有自己嘅家，林瘋都話仲未習慣。將有機會下月10號，季前賽對雷霆上陣嘅佢話：「有陣時我諗返轉頭，都會覺得好難以置信。今朝起身、喺健身房同望住個火箭logo，都有咁嘅感覺。」難得你仲係咁謙，新球季要加油呀！
借宿隊友梳化讚好正
J.Lin之後喺自己Twitter上面話，德州人對佢好好，同晒命話自己有床瞓，有鋪瞓梳化癮嘅佢，大讚隊友柏臣斯家中嘅梳化好正；仲話後者個食物儲藏室仲正，但係又唔講點解喎，引到網民都想知個儲藏室有咩咁正！
火箭季前賽程
10/10 主場對雷霆
12/10 主場對黃蜂
14/10 主場對馬刺
15/10 作客對小馬
17/10 主場對灰熊
24/10 作客對黃蜂
26/10 作客對魔術
日期為美國時間
資料來源：火箭官網