雖然CY同班官輪流叫市民小心樓市風險，但樓市係咁升，有樓喺手都唔捨得放，豪宅情況就更加嚴重。除非為咗分身家，要趕住賣樓套現，兼以後唔多會見咁囉。名模Rosemary父母好似就係呢類，兩位搞緊離婚，要賣屋分錢，最近成功以6500萬、呎價1.7萬賣咗睦誠道43號渣甸山花園低密度住宅畀Tony鄭錫強，Tony中文姓名同彤叔個姪一樣。佢兩夫婦早於91年以公司名義用600萬買入呢間屋，有成3700平方呎，揸咗21年，差不多賺6000萬，有成十倍升幅。不過家陣啲豪宅億億聲，Rosemary父母分咗錢之後，斷估好難買番同類豪宅。地產代理話，渣甸山花園已經幾年無成交，業主普遍都係一手買入，揸到家唔捨得放，如果名模父母唔係要分家產，都好難有貨放出來賣。