度日如年呢四隻字，梁班子肯定好大感受。鬼咩，上任百日唔夠，唔單止局長先後爆出醜聞，就連社會問題都搞到一鑊粥；塌樹、膠災後又有反洗腦大風暴，其中以教育局局長、人稱「唔得掂」吳克儉最惹火，難怪佢都自嘲走入熱廚房78日，簡直好似七年咁長呀！
被視為「梁粉」大本營嘅香港專業及資深行政人員協會前晚６歲生日，邀請幾位屬協會成員嘅司、局長，包括袁國強、陳家強、高永文同陳茂波等，連埋吳克儉登場「真情對話」，分享走入熱廚房兩個月嚟嘅辛酸。
吳克儉最多苦水
其中當然以吳克儉最多苦水。洗腦搞到民望插水兼被叫下台，睇怕佢入政府前都估唔到會搞成咁。所以佢都大呻，話入咗政府78日之嘛，點解好似七年咁長？箇中辛酸不足為外人道。其實佢都唔係最苦，事關林鄭司長，話度日如年㗎，即係做司長幾十日，形同捱足幾十年！不過吳克儉仲有心情講笑，話專資會今屆有成六個議員，所以專程到訪，提早拉票。
劏房局長陳謬波嘅日子相信亦唔好過，苦笑話前晚係佢呢排最開心嘅一日，因為個個都係「自己人」。高永文就估唔到入政府後竟然有得遊船河。哦，原來係自嘲同林鄭月娥坐船去離島執膠。搞緊雙非問題嘅袁國強似乎最風平浪靜，佢話估唔到入政府仲忙過做大狀，因為個個部門都搵佢攞法律意見。
全場以陳家強最風騷。梗係啦，忽然升呢做「超班馬」，唔開心就假。佢仲話多咗人入廚房，搞到鑊氣越嚟越大，好似意有所指咁，但補鑊稱鑊氣夠大、餸菜先好味。
mailto:[email protected]