【本報訊】「你賠夠錢畀我，祠堂都可以畀埋你。」面對新界東北發展計劃，上水鄉事委員會主席侯志強如是說。不少村民反對計劃，提出不遷不拆，他認為只屬少數聲音，更指現時只得極少數居民在村內，「用機關槍去掃，都死唔到十幾人呀！」
「祠堂都可以畀咗你㗎」
今次計劃中，原居民村落大都獲保留不用鏟平，但作為代表原居民利益的鄉事派成員、上水鄉事委員會主席侯志強說，不認同反對聲音，「佢哋不遷不拆都係口號嚟咋，只要有清楚合理賠償，好多人都想走。」他指如果只向村民提到要拆屋滅村，當然很多人會害怕反對，但若有清晰賠償政策，反彈自然減低，「每個人只係要安居樂業」。
侯志強不認為政府常在發展計劃中偏袒原居民，「以前要起船灣淡水湖，都拆咗十幾條原居民村啦！」他認為只要有合理賠償便無問題，「你畀夠錢我，祠堂都可以畀咗你㗎！如果你要收我哋村，賠足我哋咪走人囉。」
他形容現時村民反對發展的聲音只佔少數，「以古洞為例，號稱幾千人住，我用機關槍去掃都死唔到十幾人！」強調自己說法無問題，「我講完可能好多人唾罵我，但我講嘅係事實。」對於不少村民提到政府並無充份諮詢，他這樣理解：「貼告示你又唔睇，諮詢會你又唔去，家喺度賴冇用嘅。」
侯志強指，真正為村民做實事的人，是應該為村民爭取權益，例如原村安置及上樓等，最重要是有合理賠償；他又覺得現時太多人渾水摸魚，「住幾年你就話係村民，我唔認同囉，人哋住咗十幾廿年嗰啲就係喇。」
可像菜園村一樣搬村
有意見認為發展計劃是為中港融合鋪路，侯志強指，「人哋肯嚟做生意，我覺得係自己本事喎，吸引到人嚟；邊境附近可以試吓搞展銷場，內地好多產品都有好大市場。」
他直斥現時的人反對，卻無提出具建設性建議，「你話呢度唔畀起樓嗰度又唔准，外國邊係咁㗎？你有本事去月球買樓都得啦！」
侯志強表明支持發展，但要照顧不同訴求，有需要可像菜園村一樣「搬村」，「政府如果話搵唔到地，我幫你搵囉，上水咁大點會冇地呀。」他指每名被拆屋的村民會獲特惠賠償金，政府可協助他們在新土地上以優惠價建屋，用類似新界村屋政策規管，讓他們安居樂業。