已故天后梅艷芳嘅遺產物業解凍出售，跑馬地毓秀大廈頂層連天台單位上月拍賣過，但叫到去1040萬，未到底價收番。
呢個單位噚日翻叮，竟然以980萬成交，雖然高過開價9%，但低過上次賣唔出個價60萬，梅艷芳大佬梅啟明又認為個價OK，認真弔詭！
唔係粉絲 買來投資
買家唔肯開名，總之唔係阿梅粉絲，買來投資，但佢好似唔知呢個單位有僭建，未知有冇手尾跟！佢噚日出價算係積極，900萬起標拍賣，一開波就有人承接，最初每口價10萬，有四人輪流出價，節奏明快，尾段每口價減至5萬，再減到1萬，最後得番一男一女爭，男嘅贏咗。
負責拍賣嘅忠誠拍賣行總經理鄭世傑解釋，上次舉最後一口價嘅人只係負責承價（即係托價），所以賣唔出，今次以符合業主底價成交，任務完成。