華華好少讚人，滙豐銀行最新喺五個滙豐卓越理財中心推出「櫃位服務短訊提示」服務，真係要畀個讚佢。
擴展SMS服務
客人喺理財中心攞籌後，可以留低手提電話號碼，然後離開做其他嘢，差唔多時間會收到SMS，叫你返去理財，呢個idea真係相當好。
滙豐早於今年6月喺九龍塘又一城理財中心試推呢個短訊提示服務，見反應幾好，推廣開去，家陣鰂魚涌、太古廣場、九龍站圓方同沙田廣場嘅卓越理財中心都有呢個服務。滙豐約有50個理財中心，好似話計劃遲啲將服務擴展開去。
查實用得卓越理財中心嘅客，至少有100萬資產，時間就係金錢，真係冇理由要人喺理財中心呆等，攞咗籌之後行開食吓飯、濕吓平，點都好過心裏面哼住「等，寂寞到夜深……」！