蘋機會:英式雪糕筒入屋

蘋機會:英式雪糕筒入屋

閒閒哋花五至六位數字揀一對喇叭,除咗代表形象與品味,音色也必然講究。但唔熟悉高級音響係咪就無機會「上車」?又唔一定,Meridian兩聲道喇叭M6,設計成雪糕筒般,毋須對音響有專業知識,插線即播,操作簡單。
記者:陳國輝
攝影:蔡家輝
模特兒:Irene@Zmodel

飛擴音機靠iPad

為求靚聲,你會唔會犧牲客廳幾百呎空間,去安裝前後級,再鋪到一地喇叭線,甚至翻新全屋,打造成一間私人視聽室?就算你肯,另一半都會同你大打出手!Meridian喺英國已有多年歷史,從多年前參與Blu-ray、DVD核心開發,到數碼轉換、TrueHD數碼編排,甚至幫埋《Star Wars》做後期製作,凡係Digital Audio事情,都幾乎同佢有關。M6屬於旗下入門級有源揚聲器,特點係透過數碼訊號來處理。據音響專家Ken所講,有源喇叭比傳統喇叭大五倍Power,而最大分別是唔使額外添置擴音機、昂貴喇叭線等,只要駁上提供SpeakerLink技術嘅播放器,如此簡單組合,即可欣賞靚音樂。
或者你認為,佢玩得好封閉、好自私喎!咁就見仁見智,但Meridian似乎跟數碼產品無法分開,例如今次示範中,佢除咗結合同牌子儲存兼播放系統Control 15之外,更可透過下載Apps令iPad變身為M6遙控器,由分類、選曲、播放等一機搞掂晒,比傳統高級音響明顯前衞同大膽!

機身結合陶瓷與塑膠物料,據稱可降低箱聲問題。

揭開喇叭網會見到一隻85mm全音單元。

專用SpeakerLink勝在接駁簡單,但只適用於同系音響,略為局限。

喇叭頂部有指示燈,Standby時顯示白色。

Meridian Sooloos可上網下載,可顯示中文歌名。

音響專家Ken

減箱聲諧震人聲甜

睇見咁獨特嘅雪糕筒形四邊包圍設計,莫非佢採用360o環繞發聲?拆開喇叭網會發現,原來M6只具備一組85mm全音單元以及另一組140mm低音單元,雖然做唔到環繞全屋效果,但音色表現,特別係人聲效果最值得一讚。當日我哋喺大概400呎嘅房內試聽陳潔儀專輯《想像空間》,阿Ken解釋,由於M6以陶瓷結合塑膠物料成隻啤出嚟,好處係有效降低箱聲同諧震,尤其聽慢歌例如《等了又等》,甚至清唱部份時,唔只人聲甜美,感覺仲非常舒服。反之再聽勁歌嗰陣,低頻表現就一般,聽開Pop會幾啱Feel,若聽慣Rock或鍾情Heavy Metal嘅老友,就要認真考慮吓!

結合Meridian的顯示及播放系統,用家可直接篤芒點歌。

現場試聽陳潔儀專輯《想像空間》,慢歌表現特別好。

Meridian M6 Spec

單元:1組低音(140mm)、1組全音(85mm)
最大輸出:350 Watts
機身:陶瓷結合塑膠物料
連接:Meridian SpeakerLink In/Out(RJ45)
體積:921(高)×66-300mm(直徑)
重量:18kg
查詢:Richcom(2314 0811)