意甲球迷今季想睇意大利波，暫只可靠歐聯歐霸頂頂癮。近年積弱的意甲要翻身，最簡單直接當然靠歐聯打出表現；可惜，去屆聯賽季軍烏甸尼斯唔生性，在歐聯附加賽竟連布拉加也贏不了，互射12碼出局，令意甲征戰歐聯本已不大的「大軍」陣容更小，只餘AC米蘭及祖雲達斯。兩隊勢孤力弱兼各有隱憂，看來意甲球迷要買定驚風散。
被編入C組的AC，比較令我擔心。同組有西甲的馬拉加及俄超「暴發戶」辛尼特。馬拉加上季「暴發」完後，今季「暴瘦」，但在財困而變賣不少球星下，開季表現不算走樣，前線在沙維奧拿及西班牙奧運腳伊斯高帶領下，速度技術兼備；碰巧AC本季中堅人選，舊人邦利拿欠速度、新人法蘭斯高阿沙比欠經驗，實在令人擔心。面對有侯克壓陣的辛尼特，AC米蘭亦難佔上風，要出線一定要每場零犯錯兼發揮百分百水平，不無難度。
祖雲達斯身處的E組，同組除車路士外，薩克達及丹麥冠軍洛斯查蘭特雖實力平平，但祖記最大對手卻是自己。上季祖記勇奪意甲，教練干地調兵遣將功夫一絕，而且他善於在場上激勵球員鬥志，一段賽前訓話被放上網，連對手加度素都驚嘆「干地型過教父！」可惜這位星級教練捲入假波醜聞而被罰停賽10個月，少了他在場邊督師，尤其在水平較高的歐聯賽事中，實在好蝕底。今晚作客車仔，只望不要大敗開壞個頭。
文：方柏翹
now足球評述員