伯南克宣佈QE3，無時限無金額限制每月購買按揭債券400億美元之後，香港特區政府急急宣佈限制、收緊按揭貸款，陳德霖、曾俊華同日（九月十四日下午）出場宣佈，向記者特別講解。呢啲措施有冇效呢？睇落就冇嘞，一來最受影響嘅係買第二個單位嘅人士（內地稱第二套房），對首次置業人士不算有大打擊，最煩親嘅，其實係邊緣買家，儲夠錢俾首期，按揭供款啱啱夠嗰類，新措施一出，佢地有可能借唔到足夠按揭，又要籌多一兩年，但到時若果樓價再加速上升，咁就係咁先。一位經濟學教授H午飯時對左丁山話最緊要有充足土地供應，速速推出市場，但另一位教授C就話有地都要發展商願意消化，現在有一個胃納問題（absorption capacity），有地都未必起到樓。講到呢點，議論多咯，記得教授L曾在馬會向左丁山講過，香港每年嘅基建工程如果按照前年價格，合約總值超過三百億元嘅話，香港就會出現建築樽頸，工人唔夠吖嗎！而今建築材料價高，工人薪金高，起大學宿舍嘅建築費都要三千元一呎，教授L講嘅上限大抵可以提高到五百億元，但目前全港基建上馬，工人嚴重不足，再有住宅土地供應嘅話，真係要排隊等上馬，冇咁快有新單位推出嘅。物業經理基金總裁W對此有一手認識，佢話：「三行工人的確嚴重不足，我地嘅商場裝修、維修費用，近兩年大幅度上升，主因係工人薪資上升，而且在香港島搞裝修更麻煩，判頭話絕大部份工人住在九龍、新界嘅公共屋邨，香港島好少工人，我地研究後願意支付額外location allowance，俾多千幾二千蚊一個月，先至有工人肯過海到港島開工！」諸位教授講講吓，引用新加坡經驗，認為需要仿效新加坡輸入建築工人興建Marina Bay咁嘅做法，容許輸入建築工人。左丁山立即潑冷水：「想梁特首死咩，香港好多評論員及議員最鍾意講學習新加坡興建組屋、清潔空氣，但一旦講到學習新加坡輸入工人，佢地一定同政府死過，要過陳婉嫻、李卓人兩關噃，你估梁特首仲有政治資本消磨呀？」左唔得，右唔得，最終結果就是樓價繼續升。