「……乜唔知呀？有個荷里活，閘住！你唱尹光隻禁歌？乜禁歌呀？我話有個睇相先生姓何，叫理活，嘿！咪暫亂歌柄啦……」尹光在念台詞，別以為他隨口噏，這回他真的不再唱：「荷里活有間大酒店，三個肥婆呀學踢波……」而是做丑生，跟大老倌做諧趣廣東大戲，要笑死觀眾喎。記者：周燕攝影：劉永發
合家歡同名粵語長片
尹光有幾搞笑，大家有目共睹，亞視年度台慶膠歌《Gimme Five》不斷叫「亞洲！亞洲！」都是改編自尹光在YouTube有60萬點擊率的《Mr.One》，無論是少少鹹多多趣的《七個小矮人》，還是粗口擦邊球《少理阿爸》，都笑死好多後生仔，以為他已被定型為搞笑高手，誰料他反高潮一句：「我其實做開小生！」聽到他這樣說，我更想笑。
拍檔劉惠鳴說：「我哋做傳統大戲，有齊唱腔、做手，吸引傳統粵劇迷，尹光就負責吸引年輕觀眾入場。」這次尹光與劉惠鳴等老倌合演的《代代扭紋柴》，其實改編自1960年一齣同名粵語長片，是個詼諧爆笑的三代故事。話說高氏一家五口經營「高鴻基房地產裝修工程」，阿爺肥球遇上惡新抱蠻珠，蠻珠為人潑辣，擅拗橫折曲，死都拗番生，正一扭紋柴，丈夫瘦石也大喊怕怕。孫仔劍光長大成人，要成家立室，肥球夫婦於是想出以柴撼柴絕橋，娶個惡孫新抱治一治家嫂。劍光娶了如珠，肥球夫婦從中作梗，一心想搞到蠻珠與如珠婆媳不和。合家歡故事例牌和氣收場，最後一家人共同對抗山賊，孫新抱智退敵人，最後被發現是公主，劍光封駙馬，皆大歡喜。這齣粵語長片的確家喻戶曉，劉惠鳴說：「我一跟老戲迷講起，佢哋就話：『你又搬木我又搬木』嗰套吖嘛。」「你又搬木我又搬木」是這齣粵語長片裏的唱詞，老一輩肯定有印象。
倀雞新抱鬧老爺
尹光今次演肥球，這角色本由一代丑生梁醒波飾演，「我點會演得好過波叔？學到佢兩成都已經偷笑啦。波叔係好叻嘅丑生，就算你俾好少台詞佢，佢一走出台，觀眾已經好受落。」粵語長片一幕，一家人提着泥水修補房子，波叔跟鄭君綿、譚蘭卿指手劃腳，誰髹哪處都嗌餐懵，阿爺（梁醒波飾）向孫子劍光（任劍輝飾）說：「你同你阿娘兩個髹上面，我同你阿爸髹下面。」瘦石（鄭君綿飾）對劍光說：「你同你阿爺髹下面，我同你阿娘髹上面。」惡新抱蠻珠（譚蘭卿飾）倀雞發作，指自己丈夫說：「唔啱！劍光同你髹上面，我同佢阿爺髹下面。」雌威一發，惡新抱向老爺大叫：「你同我都咁大件，上上高想撻死咩？梗係髹下面啦。」上面下面指上指落，觀眾睇到頭暈，波叔和譚蘭卿身形又肥又圓，喜劇感十足。尹光年輕時跟波叔女兒梁寶珠是好友，常常作客梁家，「咪以為波叔落咗台會逗人笑，佢好嚴肅。」但對鏡頭，波叔就是走幾步路已經有本事令觀眾眉開眼笑；尹光亦然，台下他說話斯文，但一踏上舞台唱：「七個矮仔佢諗計仔掯，嗰個巫婆望到心驚到發冷震……」生鬼啜核，唱得面不紅氣不喘，八九十後無不大叫抵死過癮，與朱咪咪一樣大把後生仔Fans。
19年後的第一次
尹光說：「我其實做開小生。」是說認真的。「我細細個已經唱大戲，只不過七十年代從越南嚟到香港嗰陣，粵劇走緊下坡，一年都開唔到一兩場新戲，先至轉去唱時代曲，我家年年都有開粵曲演唱會。」19年前，尹光演過《紅了櫻桃碎了心》、《光緒皇夜祭珍妃》、《帝女花》等粵劇後就沒有再演過，今次在《代代扭紋柴》的演出可算是19年後的第一次，不過他最為人熟識的始終是廣東小曲，所以在此劇，還是做回觀眾最熟識的尹光。在粵劇版《代代扭紋柴》裏，鄭國江、李名亨把尹光的經典小曲改編，替《荷里活大酒店》、《海上風光》等譜上新詞，「正式做大戲，要食住鑼鼓做，但我唱嘅部份唔需要，你有你打，我有我唱，起完鑼鼓就唱，無粵劇功架。」光哥負責的部份，即使是梆黃（粵劇板腔類唱腔），語言也很生活化，例如會唱：「家嫂惡死又倀雞，成日家嘈屋閉。」劉惠鳴說，尹光有的是鬼才，又有粵劇底子，有助吸引年輕觀眾，「鄭國江話過，呢套劇係雅趣而不粗俗。」這天排練，隨手翻開劇本，尹光已經倒背如流，又爆肚又「扯科凡」，扯科凡是粵劇術語，意思是搞笑，他喊出來的粒粒字，真的有搞笑基因在：「光仔，我都叫你咪娶如珠呢啲女仔做老婆㗎啦！無厘火氣，無厘火氣點做生意？」
角色各有口頭禪
尹光的廣東小曲，大部份都很易琅琅上口，不少都是用舊曲譜上新詞：「例如《荷里活大酒店》，原調係《滿場飛》。」三十年代，名伶張帆就曾用國語唱過《滿場飛》：「香檳酒氣滿場飛，釵光鬢影晃來回，爵士樂聲響，跳Rumba才夠味……」歌詞本來優雅，改這改那就變成樂而不淫的「三個肥婆學踢波」版本。他又說：「許冠傑唔係有首《有酒今朝醉》咩？新馬仔四五十年代已經唱過啦，歌名我就唔記得嘞，淨係記得歌詞係咁唱：『成日大覺瞓乜都唔理，真真俾你氣死，人哋食緊晏晝，你仲喺周公處……』」這兩首歌，原曲是民謠《Oh！Suzanna》，真不得不讚改歌詞的人，簡直是鬼才。拍檔劉惠鳴、尹飛燕等老倌就繼續唱傳統大戲，有妝容、唱腔、做手、功架。劉惠鳴說：「其實小曲係粵曲其中一部份，粵曲本來無小曲，經過革新之後，喺唐滌生年代小曲開始流行，所以越加越多小曲。」在粵劇版《代代扭紋柴》裏，她演孫仔劍光，這角色在粵語長片版本由任劍輝演，一介女流演活戇直儍氣的男生，不讓波叔比下去，「任姐演得好自然，尤其佢嗰幾聲『嘻嘻』嘅笑聲。」 為突出人物性格，粵劇版《代代扭紋柴》裏的每個角色都有口頭禪，劍光開口埋口：「照直講！」肥球喜歡說：「你都無道理。」而主題曲又會有下歌詞：「……你又醒定我又醒定，個樣改咗你無得認……」不懂戲曲的觀眾也不怕聽不明白。
《代代扭紋柴》
演員：劉惠鳴、尹飛燕、陳嘉鳴、文寶森、尹光等劇本改編：鄭國江、李名亨地點：灣仔伊利沙伯體育館日期及時間：9月24日8:00pm/9月25日7:45pm/9月26日7:30pm票價：$450/$230/$120查詢：2734 9009鳴謝：翠月粵劇團尹光髮型：哈佛增髮技術中心