睇恒指周線圖，發現MACD出現買入訊號之餘，MACD線亦開始拋離訊號線，最近3次出現呢種情況，分別係2009年3月下旬、2010年9月中同2012年1月中，以恒指之後兩個月內高位計算，進一步升幅分別係3500點、3000點同2500點。如果今次順利重複以往趨勢，以上周五收報20629作為起步點，恒指兩個月內有本事升到去23000至24000，可視為後市第一個上升目標。
轉個話題講吓車股。今次釣魚島事件搞到咁大，最怕係令轎車用家出現心理障礙，短期內揸住日系車出街都可能周身唔聚財，又怕釣魚島事件每兩年出現一次（上次係2010年9月），買架車唔夠兩年就有機會俾人打爛。事件平息後，市場對於日系車嘅需求，隨時要好幾個月先至恢復，情況同日本大地震後，港人唔敢食魚生差唔多。
件事搞成咁，日系車暫時想搵內地人買都難，晉佳之前推介過中升控股（881），家最好避一避。但講到大輸家，應該係東風集團（489）至真，因為原本過咗7、8月高溫季，9月正常係產量回升之時，點知今年面對釣魚島事件，搞到要短暫停產之餘，累積唔少存貨嘅汽車代理商，即使等到事件平息，短期促銷日系車相信都有頗大困難，預計將會大幅劈價賣車救亡。產量減少，車又賣唔去，仲要年尾好大機會劈價，睇嚟東風今年下半年業績將會衰上加衰。
釣魚島事件紓限購壓力
至於國產轎車生產商係咪會着數咗？晉佳覺得直接受惠程度未必好大，因為日系車嘅需求唔會大幅度轉移去國產車，但間接睇，就有啲好處。
近期汽車限購令喺唔同城市陸續實施，國產車本屬中低檔，面對更大打擊。不過，之前深圳講明出年年初之前唔會推限購令，照計其他城市都唔會推住，釣魚島事件亦有機會令汽車行業短期出現重大打擊，限購令更加唔成為當務之急，相信國產車生產商會有更大嘅喘息空間。
釣魚島事件之後，吉利汽車（175）國產車銷量有機會保持平穩增長，眼前冇乜潛在壞消息，就已經係好消息，晉佳相信，吉利短線升番去3蚊應該冇乜問題，大可炒番轉。
晉佳
本欄逢周一、三及五刊出