大市呢兩日被點穴，但殼股就繼續炒到飛起，僑福企業（207）噚日再升9.2%，8月以來已炒高3.5倍，唔少殼股累積升幅已多，戰友落場一定要嚴守止蝕，更要慎防好消息出貨情況出現。
噚日推介嘅永利控股（876）一度抽升19%，埋單進賬12%，股價成功企穩前高位之上，可繼續留意。今日推介另一隻大折讓股泛海集團（129），集團持有大量投資物業，包括中環泛海大廈及灣仔滙漢大廈，另有多個酒店項目同多塊商住地皮，其中一塊住宅地位處屯門，肯定受惠該區新盤瓏門天價開售效應。齋計投資物業，總值已高達43億銀，較市值高出近兩倍，如果計埋手持股票及債券，PB只係0.16倍，平得可憐。
噚日一棍大陽燭爆上，成交創逾半年新高，反映有聰明錢率先入場，10日線更升穿250日線，形成黃金交叉，後市可看高一線，以PB 0.2倍作目標，股價已可見1.65元，潛在升幅25%。
唐牛