狼振英早前向各政策局發電郵，要求短期內交出可令佢民望升呢嘅民生政策，引起一啲公務員不滿。公務員事務局局長鄧國威噚日同傳媒茶敍，就力撐呢個做法冇問題，話一向都會喺施政報告前出呢啲通知，唔覺得係施壓。佢肯定公務員會繼續保持政治中立，即係邊個做特首都照樣支持，因為呢個係公務員核心價值。
市民信唔過狼政府，但鄧國威仍然覺得公務員士氣唔太差，佢承認呢兩個月政府面對好大挑戰，不過自己就唔會因此感到好大壓力，「球賽頭15分鐘啫，仲有好多機會表現嘅」。佢話5司14局架構重組過唔到唔代表冇路行，好多嘢一樣可以做。哦！仲以為冇咗呢個架構，香港會癱瘓㖭。