美國潮牌Abercrombie & Fitch上月進駐香港，安排100名來自世界各地的火辣肌男造勢，現年24歲、貌似柯震東的男模趙勁皓（King）憑健碩身形獲選成為香港代表，狂晒一排朱古力腹肌力撼筋肉老外。
King近日不但繼續受聘到A&F店中做人肉佈景板，日前iPhone5在美國三藩巿的發佈會，更用了King跟女模早前到峇里為蘋果拍下的宣傳照，令他衝出彈丸之地，認真威水。大學修讀中文系的King，畢業後曾在中學教歷史，熱愛演藝事業的他在新學年決定晉身娛圈，放棄執教鞭。
「幾日除一次衫」
King日前到大浪灣衝浪，玩到唔願走，他說：「我做咗幾年part time model，行騷拍廣告統統試過，有機會想試吓拍戲。」他雖然不吝嗇晒40吋雞扒胸，可是抗拒演床戲，他說：「我係有底線嘅。」King正靜候機會與宅男女神周秀娜登上大銀幕。King很榮幸成為A&F肌男，他說：「佢哋對男模要求好嚴格，面試期間，每隔幾日就要去除一次衫畀佢哋睇。」百名A&F肌男瘋魔飢渴港女，King說：「佢哋唔算過份，菲律賓女仔見到我哋狼好多。」
採訪：比華利
Profile
姓名：趙勁皓（King）
年齡：24歲
胸肌：40吋
身高：5呎11吋
嗜好：打籃球、健身和畫畫等。
出道：模特兒出身，A&F香港旗艦店開幕赤膊男模，曾拍攝迪士尼、Nike、adidas和東亞銀行廣告，曾參演電影《高海拔之戀》。