蘋機會：SOL　扭計撐老竇

自跟beats Audio拆夥後，Monster創辦人Noel Lee，就睇中自己個仔創立嘅Sol Republic（SR）接棒beats嘅地位。SR耳機近年喺潮界贏來唔少掌聲，尤其Tracks系列，頭帶、單元、線控任配任砌，最過癮係個強韌頭帶，又扭又屈都唔斷，就算變形俠醫咁大個頭都啱戴！　記者：徐影龍　攝影：周旭文　模特兒：Kitty@GME　查詢：思維（2955 1000）

自溝Mix & Match

噚日《蘋機會》介紹完過癮嘅屈曲概念手機，估唔到耳機界一樣咁「屈機」。Sol Republic近年喺潮界已算有名聲，公司掌舵人正正係Monster生父Noel Lee個仔，但佢毫不避忌同老竇生意有衝突。要鍊贏beats，產品喺聲靚以外，Idea仲要夠出位，為求吸引到年輕潮人注視。
最新到港嘅Tracks系列，就大玩合體分離Mix & Match，頭帶、喇叭單元，甚至連線控耳筒，都可作獨立分離，再跟其他顏色、圖案砌埋一堆，溝出自家Style。呢個襯衫元素，擺明食硬貪靚嘅後生仔女，你睇菲比斯出戰倫敦奧運，都不忘戴住佢心愛嘅Tracks HD就知。最抵死嘅，就係頭帶採用高分子物料製造，驟眼睇好硬，其實用啲力就可任意拉直扭曲，彈性咁大唔係搞Gimmick，而係為Fit盡全天下人嘅頭形，可算潮得嚟都幾細心。

Tracks三級到港　Tracks音色柔

屬入門級，非鋼琴面頭帶，不過同樣任屈任扭。本來對賣幾百蚊嘅V8無乜期望，不過實試後音色平衡比想像中好，只是低音表現稍弱，致令人聲突出，較適合聽Jazz類柔和樂曲，而且SonicSoft喇叭墊有效隔離環境噪音，聽落更舒服愜意。

Tracks HD減失真

用料提升，同樣配備SonicSoft喇叭墊及彈性頭帶，但耳罩位加入鋼琴焗漆般令面物料，喇叭單元更改為鋁金屬。音色方面配上V10 HD聲效引擎，有效減低靚聲失真程度，高低音平衡度更佳，Rapper人聲同低音各自精采，Hip Hop友啱聽。

Tracks Ultra包圍強

耳罩鋪上拉絲金屬面，畀人一種高科技貴氣感。以配備Sound Blaster音效卡嘅電腦試聽近乎無損嘅700MB《Final Fantasy》管弦音樂，即刻試出真章：音色包圍感豐富有層次，尤其序章嘅清脆豎琴聲，由遠至近毫不含糊，不被緊接而嚟澎湃鼓聲所掩蓋，難度極高。